Як змяніць свет з дапамогай Drupal і іншых адкрытых сістэм

Арганізацыі, Топ навіны |

Вікіпедыя, Linux і Drupal – гэта адкрытыя сістэмы, якія змяняюць самі карыстальнікі. Як вырашаць сацыяльныя праблемы і ўключаць людзей у грамадскія актыўнасці праз такія сістэмы, а таксама стварыць свой сайт for free распавялі арганізатары Drupal-злёту.

Цяжка назваць інтэрнэт-юзера, які б не ведаў, што такое Вікіпедыя. Менш людзей ведае, што такое Linux, і яшчэ менш чулі пра Drupal. Што яднае віртуальную энцыклапедыю, аперацыйную сістэму і сістэму кіравання змесцівам сайтаў?

Усё вельмі проста. Яны адносяцца да адкрытых сістэм – open sourcе. У шэрагу іншых з імі шчыльна працуе Фаланстэр – моладзевая арганізацыя, якая імкнецца ўсяго толькі змяніць свет. Ніжэй чытайце пра яе дзейнасць, меркаванне пра камерцыялізацыю і сацыялізацыю адкрытых сістэм, а таксама пра конкурс, дзе прызам будзе стварэнне інтэрнэт-сайту.

Фаланстар і Drupal прэзентуюць адно адное

Для Фаланстара Drupal-злёт – гэта нагода, каб падняць шмат праблемаў у грамадстве. Ён добра рэпрэзентуе дзейнасць арганізацыі агулам. За дэвізам “Будзь сацыяльным” хаваецца галоўная сённяшняя мэта супольнасці – вырашыць грамадскія праблемы праз інтэграцыю ў сістэму Drupal.

Напрыклад, гэта можа быць рэсурс, які дапаможа муніцыпальным уладам стварыць сацыяльныя сеткі, дзе жыхары змогуць выказваць сваё стаўленне па тым ці іншым пастановам, ці рэальным учынкам.

Міхась, адзін з заснавальнікаў Фаланстэра:

«У адкрытых супольнасцях ёсць людзі. Вельмі ініцыятыўныя і антыэгаістычныя. Такія, якіх не хапае зараз Беларусі. Напрыклад, інсталюе парламент сайт на Drupal, пасля трэба яго аднавіць, звярнуўшыся да такіх людзей. Гэта першая кропка “адкрыцця” ўлады. З другога боку, пляцоўкі, на якіх усталяваны функцыі сацыяльных сетак, вельмі прывабліваюць грамадзян прыймаць удзел у справах».

З дапамогай гэтага інструменту таксама можна падвысіць ступень адкрытасці ўраду. І гэта актуальна для нас сёння. Яскравы прыклад –www.opendata.by. На ім ажыццяўляецца візуалізацыя статыстычных дадзеных такім чынам, каб яны індэксаваліся пошукавікамі (у Беларусі падобная інфармацыя звычайна выкладаюцца ў сеціва ў фармаце, які не індэксуецца, напрыклад, jрeg ці pdf).

Адкрытыя супольнасці робяцца інструментам

Фаланстар спрабуе перанакіраваць плынь з выключна камерцыйнага выкарыстання Drupal-сістэмы на сацыяльнае. Зараз гэта сістэма нярэдка выкарыстоўваецца бізнэс-праектамі для стварэння і падтрымкі сваіх рэсурсаў, а за межамі Беларусі – нават і ўрадавымі структурамі, у тым ліку ў ЗША і Расеі.

Міхась: «Мы хочам, каб праз Drupal-злёт людзі зразумелі, што стварыць сайт – гэта рэальна і не толькі для профі. Каб прафесіяналы зразумелі, што на open data трэба накіроўваць увагу. Мы хочам, каб і беларусы, і калегі з-за мяжы ўбачылі, што ў Беларусі можа адбывацца падзея, якая будзе кідаць выклік закасцянелым формам: жаданню як мага больш халявы, выключна камерцыйнаму падыходу. Нашая задача – прапанаваць дзейсны інструмент».

Варта зазначыць, што агулам развіццё адкрытых супольнасцей у Беларусі не вельмі актыўнае. На думку Міхася, выправіць гэта можна толькі праз пазітыўныя прыклады.

«Спачатку некалькі чалавек прыкладвае звышнамаганні, каб паказаць прыклад, пасля пачынаецца хваля паўтарэнняў і стаўленне пачынае мяняцца».

Самым распаўсюджаным open source ў Беларусі з’яўляецца Вікіпедыя, яна ж ёсць індыкатарам стаўлення большасці людзей да адкрытых супольнасцей.

Жыццёвы цыкл грамадскай ініцыятывы

Усе ініцыятывы пры сваім утварэнні робяць выклік навакольнаму свету. Яны імкнуцца займець і заняць сваю нішу. Гэтая ніша можа з цягам часу камерцыялізавацца, што нярэдка адбываецца: «О, а гэта някепска працуе! А давайце зробім унёсак за ўваход, а давайце на шырокі размах пусцім».

З іншага боку, ініцыятыва можа дэградаваць, таму што ў людзей змяняецца сістэма каштоўнасцяў, а аднаўленне калектыву не адбываецца.

Міхась: «Мы дасягнулі нейкага ўзроўню і гатовыя перадаць сваю энергію і веды. Ніводная ініцыятыва, якая стварылася 5-10 год назад, не захавала тых жа мэтаў, што і напачатку. У пэўных ініцыятываў засталіся хіба жаданне змяніць грамадства ці хоць што-небудзь. Тыя, хто пачаў раней, мяркую, знялі ружовыя акуляры… і некаторыя працуюць па звычцы, па сваёй распрацаванай раней метадалогіі. Калі б мы паводзілі сябе такім чынам, мы б дагэтуль займаліся толькі дваровымі футбольнымі турнірамі. Зараз дваровы футбол вельмі развіты, а мы шукаем новыя аўдыторыі адзінадумцаў.

Патрэбны сайт? Табе на Drupal-злёт!

Фаланстар вырашыў падвысіць сабе карму і абвесціў чарговы Drupal- злёт, які адбудзецца 15-16 снежня. Падчас яго для ініцыятывы, якая пераможа ў конкурсе, будзе створаная інтэрнэт-пляцоўка.

Натуральна, сайт будзе стварацца “Бесплатно, то есть даром”… але не на халяву, бо злёту будзе папярэднічаць шчыльная праца з ініцыятывай па стварэнні канцэпту сайту. Партрэт тых, каго вышуквае Фаланстрэр – маладыя людзі, у якіх ёсць шмат імпэту, але недастаткова ведаў для плённай дзейнасці, якая ў дадзеным выпадку мусіць мець сацыяльную афарбоўку у шырокім сэнсе.

Даведка АМП

На дадзены момант Фаланстар мае шэраг праектаў і запрашае вас далучыцца да іх. Патрабуюцца валанцёры для дапамогі ў арганізацыі Drupal-злёту.

Праекты Фаланстара

Феміда Фаланстара – мае юрыдычную скіраванасць, спецыялізуецца на аўтарскім праве і капірайце ў Беларусі. Зараз дзейнасць прыпыненая, ізноў распачнецца пасля правядзення злёту ў снежні.

Drupal-клуб – “месца, дзе мы спазнаем сістэму і вучымся быць сацыяльнымі. Дапамагаюць нам у гэтай справе CMS Drupal і прынцыпы open source супольнасці.”

Сустрэчы па Linux і іншых адкрытых сістэмах.

Falanster’s Speakers Club – на дадзены момант займаецца вывучэннем ангельскай мовы і рыторыкі.

Фаланстэр Вконтакте і Фэйсбук.

Ганна Валынец

www.ampby.org

comments powered by HyperComments

Каментары