Жыццё пасля гісторыі альбо развагі над дыягназам «Гуманітарый»
Твітнуць
Выпускнікі гістарычных спецыяльнасцяў Віцебскага дзяржуніверсітэту розных гадоў запрашаюць паразважаць пра свае пакручастыя і насычаныя шляхі па рэаліях пасляўніверсітэцкага жыцця. Круглы стол адбудзецца 28 студзеня.
Ужо напрацягу месяца ў Віцебску ідзе праект «Жыццё пасля гісторыі». Пад яго дахам група выпускнікоў гістарычных спецыяльнасцяў Віцебскага дзяржуніверсітэту розных гадоў распавядаюць пра свае пакручастыя і насычаныя шляхі па рэаліях пасляўніверсітэцкага жыцця. Іх адрозненні ад сакурснікаў у тым, што яны вырашылі не здраджваць клятве Кліо, а валтузіцца ў гістарычных плашчынях: за ўніверсітэцкімі кафедрамі і ў турыстычных аўтобусах, у музейных фондах і на аспіранцкіх стыпендыях, у школах і культцэнтрах, вывучаючы, выкладаючы, папулярызуючы мінулае альбо час ад часу вярстаючы зборнікі гістарычных артыкулаў ці малюючы афішу для выставы ваярскага рыштунку XVII ст.
Інтэрв'ю выпускнікоў пакрысе збіраюцца ў нізку асабістых гісторый з рэцэптамі поспехаў і прычынамі няўдач, з парадамі для тых, хто яшчэ вагаецца і тых, хто ўжо не мае выбару. Адмысловы зборнік гэтых лёсаў выйдзе напрыканцы месяца, а пакуль студэнты, выпускнікі і выкладчыкі-гісторыкі збіраюцца за круглым сталом, каб паразважаць над дыягназам «Гуманітарый» і выказаць меркаванні па лячэнню.
Круглы стол пройдзе ў Віцебску 28 студзеня (суботу) а 17-ай гадзіне ў музычнай гасцёўні па адрасе пр-т Фрунзе, 11.
Падзяліся з сябрамі ў сацыяльных сетках
