Конкурс "Беларусь гэта... ". Далучайцеся!
ТвітнуцьЯкой мы бачым Беларусь, што паказваем на сувенірах і ў турыстычных буклетах. З якімі вобразамі і сімваламі зараз асацыюецца наша краіна, а якія элементы культуры непапраўна забыты і не знаходзяць мейсца ў сённяшнім жыцці? Калі ты малады, крэатыўны, любіш сваю Радзіму і маеш што адказаць на гэтыя пытанні — далучайся да праекту "Беларусь гэта... ".
Кожнае меркаванне будзе пачутае, і магчыма менавіта твая ідэя будзе ўвасоблена на новай сувенірнай прадукцыі. Удзел у праекце не патрабуе адмысловых здольнасцяў. Гэта даступна для кожнага і патрэбна ўсім нам, каб ведаць болей пра сваю краіну і ганарыцца ёю.
НОВОШТА?
Культура кожнага народу мае свае сімвалы. Яны прэзентуюць унікальнасць і непаўторнасць кожнай краіны, яе адметныя рысы. Нідэрланды пазнаюць па ветраках і цюльпанах, Аўстралію па кенгуру, Японію па катана і сакэ, Расію па самавару і матрошках.
А з чым у замежнікаў, а перад усім у нас саміх асацыюецца Беларусь? З бульбай, трактарамі, ці наогул ні з чым? У краіне з тысячагадовай пісьменнай культурай, з багацейшай фальклёрнай спадчынай, рынак сувенірнай прадукцыі, скажам мякка, не самы багаты і разнастайны. А часам ён і наогул мае адноснае дачыненне да беларускай культуры.
Таму мы прапануем менавіта Вам, маладым беларусам, вызначыць, што варта лічыць сваім, атаясамліваць з роднай краінай.
ШТО БУДЗЕ АДБЫВАЦЦА?
Цягам месяца мы будзем прымаць прапановы бачання вобразаў Беларусі, каб пасля найбольш папулярныя выставіць на шырокае абмеркаванне і галасаванне. Па яго выніку будзе выраблена сувенірная прадукцыя з сімваламі-пераможцамі. Кожны з актыўных удзельнікаў дыскусіі будзе мець магчымасць атрымаць сабе значак, бралок ці іншы сувенір з абранай выявай. А аўтары трох лепшых прэзентацый будуць узнагароджаны.
УМОВЫ КОНКУРСУ
Мы прымаем на конкурс тэкст не большы за 12 сказаў. Ён мусіць пачынацца са словаў Беларусь гэта..., і далей мець назву і апісанне той рэчы, з'явы якім, вы лічыце, беларусы могуць сапраўды ганарыцца. А так сама утрымліваць абгрунтаваны адказ на пытанне чаму гэты сімвал варты пашаны. Можна дадаваць і ілюстрацыі, але не абавязкова.
Прапанаваныя сімвалы могуць быць любымі: прадметы побыту і рамесленыя тэхналогіі, артэфакты розных сасловій і гістарычных эпох, міфалагічныя персанажы і іншыя элементы культуры. Вобразы могуць мець канкрэтнае ўвасабленне альбо быць абстрактнай з'явай. Адзінае, яны мусяць быць дакладна беларускія, пажадана ўнікальныя (не мець аналагі ў іншых культурах), і не з'яўляцца дзеючай сімволікай арганізацый і устаноў.
Прапановы можна выкладаць тут http://vkontakte.ru/club19072840 ці дасылаць на скрыню lubluganarus@gmail.com
Вашыя варыянты будуць адразу бачны ўсім ўдзельнікам і даступны для абмеркавання. Але асноўны выбар будзе зроблены пазней, пад час галасавання і з дапамогай журы конкурсу.
Распавядзіце ўсім, якая яна — Беларусь!
