III ФЭСТЫВАЛЬ НЕФАРМАЛЬНАЙ АДУКАЦЫІ

8-10 кастрычніка 2010 году адбудзецца III Фэстываль нефармальнай адукацыі. Мэтай Фэстывалю  зьяўляецца дэманстрацыя ўнёску арганізацыяў нефармальнай адукацыі ў павышэньне якасьці жыцьця.

Цягам трох фэстывальных дзён удзельнікаў чакаюць:
 — прэзэнтацыі разнастайных адукацыйных праграмаў і праектаў;
 — майстар-клясы ў выкананьні найлепшых адукатараў;
 — творчыя конкурсы;
 — дыскусіі па актуальных пытаньнях разьвіцьця нефармальнай адукацыі ў нашай краіне й за мяжой;
 — культурная праграма;
 — знаёмства з патэнцыйнымі партнэрамі для рэалізацыі уласных ініцыятываў.

Да ўдзелу ў Фэстывалі запрашаюцца прадстаўнікі арганізацыяў, якія працуюць у сфэры нефармальнай адукацыі ў Беларусі ды іншых эўрапейскіх краінах.

Удзел у Фэстывалі можа быць заяўлены ў наступных формах:
1) аўтар паведамленьня на сэкцыі, круглым стале, панэльнай дыскусіі;
2) арганізатар майстар-клясы, «дэманстрацыйнага курсу», трэнінгу;
3) прэзэнтацыя кнігі альбо іншага выданьня й удзел у конкурсе выданьняў;
4) прэзэнтацыя арганізацыі;
5) публікацыя ў часопісе «Адукатар»;
6) вольны ўдзел.

Пры рэгістрацыі ўдзельнікаў прымаецца рэгістрацыйны ўнёсак за ўдзел, які дае права на поўную акрэдытацыю на Фэстывалі. Поўная акрэдытацыя прадугледжвае атрыманьне інфармацыйных матэрыялаў (у тым ліку спэцыяльнага выпуску часопісу «Адукатар»), месца для стэнда арганізацыі/праекту, месца для правядзеньня майстар-клясы альбо прэзэнтацыйнага курсу, кава-перапынкі, вячэры 8-га і 9-га кастрычніка. Поўную акрэдытацыю могуць атрымаць ня болей за дзьве асобы ад адной арганізацыі.

Арганізатары не кампэнсуюць транспартныя выдаткі ўдзельнікаў.

Электронную форму заяўкі можна запоўніць па спасылцы:
https://spreadsheets.google.com/viewform?formkey=dHVrZ241UUM2YUxjSzFXMTZIaV9XR1E6MQ

Апошні тэрмін падачы электроннай заяўкі: 10 верасьня 2010 году.