Сябры Маладога Фронту абскарджваюць збіццё

Сябры Маладога Фронту абскарджваюць збіццё, неабгрунтаваныя канфіскацыі, жорсткі разгон традыцыйнай мірнай акцыі ў Дзень Святога Валянціна.
Маладафронтаўцы падалі ў пракуратуру Цэнтральнага раёну Мінска восем скаргаў на незаконнае затрыманне, збіццё, канфіскацыю рэчаў, абразы і лаянку з боку супрацоўнікаў міліцыі 14 лютага. Асноўныя патрабаванні ў скаргах — даць прававую ацэнку дзеянняў міліцыянтаў, якія супрацьпраўна сябе паводзілі, прыцягнуць іх да адказнасці, паведаміла прэсавы сакратар арганізацыі Наста Лойка.

— Мы напісалі шэраг скаргаў адносна таго, што адбылося 14 лютага. У першую чаргу гэта, безумоўна, скаргі на незаконнае затрыманне актывістаў. На тое, што забралі шэраг асабістых рэчаў. Таксама на збіццё, што міліцыянты ўжывалі грубую фізічную сілу, нецэнзурна выказваліся і абражалі актывістаў. Будзем ад пракутатуры Цэнтральнага раёна чакаць нейкіх адказаў і рэакцыі. Падалі восем скаргаў. Пададзім яшчэ.

У хуткім часе маладафронтаўцы падрыхтуюць скаргу на адміністрацыю гатэля «Краўн Плаза», які напярэдадні Дня Святога Валянціна скасаваў дамову на памяшканне, у якім планавалася правесці нацыянальную прэмію «Люблю Беларусь».

Радыё Рацыя

Цэтлікі: Дзень Святога Валянціна